Çапла-çапла, ачаш   çилпе  çăвĕпе  пăшăлтатса   тăван  енĕн  анлă  та  пуян  уй-хирĕнче  тыр-пулĕ   пиçрĕ. Кĕр  мăнтăрĕпе  вара  шурă  кулачĕ   сĕтел   çине   çитрĕ.

Паллах-паллах, çак   пархатарлă  ĕçсемшĕн  эпир  çĕр   ĕçченне  тав  тăватпăр, кĕтнĕ  кану-уяв  йĕркелесе  юрă-сăвăсенче   мухтатпăр.

Ял  хуçалăх  тата   тирпейлекен   промышленность  ĕçченĕсен  кунĕ  кăçал чÿк  уйăхĕн  6-мĕшĕнче  районти  çĕнĕ культура   керменĕнче, Шăхасанта иртрĕ. Унта районта   асăннă  отрасльте  вăй  хуракансем  тата ветерансем  кĕтнĕ  уява  пухăнчĕç. Чи  хастаррисене,  ăмăртура   мала  тухнисене тав  хучĕсемпе,  тĕрлĕ  наградăсемпе, хавхалантару  парнисемпе  чысларĕç.

Районти   чи  пултаруллă культура   коллективĕсем  вара  çĕр  ĕçченĕсене  тĕрлĕ   сăвă-юрăсенче   мухтарĕç, хаваслă  ташă-юрăпа хавхалантарчĕç,  илемлĕ   кĕпе   тумтирсемпе  килентерчĕç.

Чăннипех, илемлĕ ташă-юрă  уяв  хăнисемшĕн  кĕтнĕ  паха  парне, чун  уççи  пулчĕ.  Савăнăç, хавхалану кÿрекенсен  ушкăнĕнче  кăçал  та  Мăкăрти «Туслăх» фольклор   ушкăнĕ   пулчĕ. Вероника  Иванова (вăл  ертÿçĕ  те, ăста   купăсçă  та) тăрăшнипе «Туслăхсем» аграрире  тăрăшакансене  тата  уяв  хăнисене хайсем  тĕрленĕ-çĕленĕ, эрешленĕ  чăваш  кĕпе-тумтирĕсемпе   тыткăнларĕç,  вăйă-ташă  картине  чĕнсе  çитес  çул  тата та  тăрăшса     ĕçлемешкĕн  çĕр  ĕçченĕсене  иксĕлми  хавхалану  парнелерĕç.

                                                                          Уяв  ячĕпе   пурне те!

Сунатпăр   сире   хĕвеллĕ  ире, Турă  упратăр   сире  те   пире! Ырри  сирĕнпе-пирĕнпе  пĕрле   паян   та  ыран- яланах  пултăр. Уяв кĕреки кĕр  мăнтăрĕпе пуян   пултăр, уява  пухтăр   кашни   çул  туслăх-тăванлăх  юрри  янратса!

Фоторепортаж

Чагасьское сельское поселение Канашского района