Сивĕ  хĕл  кунĕсене  пăхмасăрах,  нарăс  уйǎхěн 7- мĕшĕнче, Мăкăрсем  туслăн  клуба  пуçтарăнчĕç. Ку хутĕнче  мухтавлă Канаш ен ĕçченĕсене  юрă-ташăпа савăнтарма Антонинапа  Петр Красновсем  тата  «Шуçăм» фольклор  ансамблĕ  çитрĕç.
Чун-чĕре  уявне  Мăкăр  ял  ĕçченĕсем  кăна  мар,  кÿршěсем те: Чакаçсемпе  Тури Юнтапасем,  Кармамисем, Канашсемпе  Шупашкарсем  те  çитрĕç.
Ельчĕкпе (Петр  Краснов-Ельчĕк  каччи)  Йĕпреç (Антонина – Йепреç  пики ) эстрада  çăлтăрĕсене  куракансем  чăваш  наци  радио  хумĕсем  çинче   юратсах  итлеççě пулин те, куçа- куçăн  курса  калаçма, юратнă   юрăçсен  юррисене  итлесе   киленме  хавас  пулчĕç.
Асăнса  хăвармалла,  уяв  каçĕ   Красновсем  тăрăшнипе   йĕркеленнĕ. Асăннă  юрăçсем «Туслăх» фольклор  ушкăнĕн 5-çулхи  юбилейне  хутшăннăччĕ, ял  халăхĕ  ыйтнипе  концертпа  килессе  шантарнăччĕ. Мăкăрсем  ун чух  çепěç те уçǎ  саслă,  сăпайлǎ та  телейлĕ  мăшăрăн  юррисене  питĕ  кăмăлланǎччĕ, тепре  итлесе  киленме  ĕмĕтленнĕччĕ.
Пирěн юратнă  юрăçсем  «Туслăх»  ушкăнĕн пултаруллăхĕпе   тăрăшулăхне  кура  тата  унăн  пултаруллăхне  аталантарас, çавăн  пекех  ытти  ушкăнсен  пуян  опычĕпе   паллаштарас   тĕллевпе «Шуçăм» фольклор  ушкăнĕпе (ертÿçи  Диана  Сусарина (Антонинǎн ентешě), Диана   ăс- тăнне   пирĕн   мухтавлă  Канашри  педагогика  училищинче  туптанă, юратнă  проффессине  алла  илнĕ)  уява çитрĕç . Уяв  каçĕнче  юратупа  туслăх,тăванлăх  юррисем  шăранчĕç . Куракансем  кашни  юрра-ташша  ăшă  алă  çуппипе  кĕтсе  илсе хавхалантарса  ăсатрĕç,  пĕлекен  тата  килĕштерекен чуна  вырнаçнǎ  юрăсене  пĕрле  юрларĕç, чăн  чăваш  тĕрриллĕ асамат  кĕперĕ  пек   илемлĕ кěпе – тумтире, тухъясемпе  хушпусене курса  киленчĕç,  ырǎ  сăмахсем  каларĕç.
Аслă  ăру,  вăл  шутра  93 - çулхи  педагогика  ĕç  ветеранĕ   Валентина  Ильина   тата  81- çулхи  Виталий  Петров ( вăл «Туслăх» ушкăнĕн  хастар  арĕ), асăннă  тĕл  пулусем  уйрăмах  çитĕнекен  ăрушăн кирлĕ  тата  хаклă  пулнине  уçăмлатрěç, чăвашсен   тĕрлĕ  тăрăхěсенче  пурǎнакансен  ырă  йăла-йĕркисемпе  паллаштарнăшăн   тата  паха  аса-илÿ  çăмхине  сÿтме  пулăшнăшăн  чĕререн  тав  турĕç.
«Шуçăм» фольклор  ушкăнĕн  ертÿçи  Диана  Сусарина  «Туслăх» ушкăна  малашне те  суйласа  илнĕ  юратнă  юхăмра  çирĕп  утăмсем  тума,  иксĕлми  хавхаланупа  çитĕнÿ, çирĕп  сывлăх  сунчĕ.
Клуб  тата «Туслăх» фольклор  ушкăнĕн  ертÿçине,  Вероника  Иванована,  культура  вучахне  сÿнме  паманшăн , чăвашсен  ырă  йăли- йĕркине  аталантарма чунтан  пысăк  вăй  хунăшăн, ял  ĕçченĕсемпе  пĕр  чĕлхе   тупса  туслăн ĕçленěшĕн  тав  турĕ.

«Халăхпа  ĕçлеме  пĕлни - пысăк  ĕç,- терĕ  Диана Сусарина. -Малашне те  ăшă та  туслă , ĕçлĕ  тĕлпусем  пуласса  шанатăп. 150-а  яхăн  куракана  пуçтарни сахал  пулать, пире  кăмăлланăшǎн  тав  тăватпăр  та  савăнатпăр.  Сирĕн  тăрăхра  юрă- ташăна  юратни, чăвашлăха  упраса  хăварас  тесе  çунни  хĕвел  пек  çиçсе  тăрать. Тав  ырă  ĕçсемшĕн, хавхалану  малашне те  ан иксĕлтĕр, сирĕнте  пуласлăха  куратпăр».

Уяв  каçĕ пурне те  савăнăçпа  хавхалану  парнелерĕ. Пурте  ырă  кăмăлпа  киле  утрĕç. Савăнăçлă  кĕвĕ  юххипе ватăсен  те,  çамрăксен те  чĕрисем  ташларĕç  те  юрларĕç ,  пĕр  чунлă  пулчĕç,  пуçри  йывăр  шухăшсене  те  чунри  тунсăхсене  те сирчĕç, асăнмалăх  сăн  ÿкерчĕк  турĕç. Çĕкленÿллĕ  кăмăл  - чи  хаклă  парне-çке!  

Фоторепортаж

Чагасьское сельское поселение Канашского района