Нумаях пулмасть çĕнĕ  Юнтапасен культура  çурчĕ  нихçанхинчен  çутǎрах ялкăшса  çуталса ларчĕ,   хаклă   хăнасене кĕтрĕ.

Тимлĕ  волонтерсем (Федорова Валентина Михайловна, Ананьев Михаил Михайлович тата унăн мăшăрĕ  Людмила) хăнасене  кĕтсе культура  çуртне çуса  тасатса  тирпей-илем кĕртрĕç, ял-йыша, куракансене, кашни урама çитсе  юрăсем юрласах йыхравларĕç.

Тахçантанпах кĕтнĕ  хаклă  хăнасен  шутĕнче  ку хутĕнче  Мăкăр ялĕнчи  «Туслăх» фольклор  ушкăнĕ (ертÿçи Вероника Иванова) пулчĕ.

Уяв,  паллах, ташă-юрăпа илемлĕ.  Мăкăрсем  куракансене  хăйсен  пултарулăхĕпе  савăнтарчĕç,   хаваслă  кăмăл  парнелерĕç,  чăваш халăхĕн  иксĕлми  пуянлăхне  кăтартма  тăрăшрĕç.

Концерт программи пуян  пулчĕ:  чăваш эстрада юррисем, пурнăçран   илнĕ   шÿтлĕ  сценкǎсем,  такмаксемпе юптарусем, чǎваш   тата  хĕвелтухăç   ташшисем, сюита,  хальхи  тата  авалхи  чăваш юррисем,  юрă саламĕсем   тата  ытти  те. Сăвă-юрă, ташă  урлă  артистсем    Мăкăр  енпе  те  паллаштарчĕç.

Куракансем  вара  кашни  артиста  ăшшǎн  алǎ  çупса хавхалантарчěç: пěлекен юрǎсене пěрле  юрларěç, чǎваш халǎхěн  ырǎ йǎли-йěркисемпе паллашрчěç.

Уяв каçĕ хаваслă  та  интереслĕ, туслă  ушкăнра  иртрĕ.

Залра  нихçанхинчен  çурхи ăшă   кăмăл  хуçаланчĕ.  Куракансен  мăшăр  куçĕсем   хаваслăхпа тулса  çиçрĕç,  чун-чĕрере   çепĕç  туйăм вылярĕ.

Çĕнĕ  Юнтапасемшĕн те, Мăкăрсемшĕн  те  çак  каç   чăн-чăн  чун-чĕре   уявĕ  пулчĕ.  Тǎван  сăмах,  чǎваш  кĕвви-çемми  уççăн  та  мăнаçлăн  янăрарě.   Çак  каç  Çĕнĕ   Юнтапасене  туслăх  тĕнчине, тăванлǎх  кĕрекине  йыхăрса  ырă  кун-çул,  иксĕлми  телей  сунчěç.

Уяв  каçĕ   нумайлăха   асра  юлĕ. Çĕнĕ Юнтапасем  чун каничченех  «Туслăх» ушкăн  шăрантаракан  селĕм  юрă-ташă ытамĕнче   пулчĕç,  капăр  тумсемпе  киленчĕç,  хăнасене  техĕмлĕ   чейпе сăйларĕç,   творчествăра  малашне  те  халăхшăн  ырă  ĕç    тума  ăнăçупа çитĕнÿ  сунчĕç.  Çĕнĕ   ырă  куна  ырларĕç. Çутă   малашлăха  шанса  çунат  сарчĕç.

Концерт вĕçленсен те  киле  саланма  васкамарĕç Çĕнĕ Юнтапасем.   Кĕмĕл  купăс  сассипе   туслăх картине  тăрса  «Туслăх»  ушкăн  пикисемпе  яшĕсемпе   пĕрле  такмакласах  юрласа ташларĕç.

Концерт  курма  килнĕ   халăх хавас  çĕкленÿллĕ  кăмăлпа   килĕсене  саланчĕ. «Концерт питĕ  килĕшрĕ,  татах  та  килĕр, чун-чĕре  уявĕ  парнелĕр!!»

Куракансем  те  парăмра  юлмарĕç,  чĕрĕ  чечек   çыххисем кашни  юрăçах  тиврĕ.

Чагасьское сельское поселение Канашского района