Энтриялěнчи  чиркěве  80  çул  каялла  аркатса  тăкнă  пулнă.  Хальхи вăхăтра  ял  çыннисем  ăна  хăйсен  вăйěпе  чěртсе  тăратасшăн.

Авалхи  чиркěве  1899  çулта  тунă,  анчах  та  вăл  чěрěк ěмěр  ытла  кăна «пурăннă»,  иртнě  ěмěрěн  30-мěш  çулěсенче влаçсем  хушнипе  ăна  çунтарса  янă. Ун  вырăнěнче  нумай  çул хушши  шкул  ларнă  пулнă.      

Чиркÿ  çук  пулин  те  Энтрияль  сала  ячěпе  пурăннă.  Храмcăp  начаррине  пурте ăнланнă.  Виçě  çул  каялла  вара  ял  çыннисем  пěрле  пуçтарăннă  та  кěлě   çуртне чěртсе  тăратма  йышăннă.  Çак  пуçарăва  Александр  Андриянов  предпринима­тель хăй  çине  илнě.  Çуртăн  йывăç  каркасне  тата  пěренисене   Кирова  саккас  панă, куполěсене  -  Волгограда.  Чиркÿ  малтан  мěнле  пулнине  ялти  темиçе  ватă  çын кăна  астунă.  Чи  ватине  чěнсе  илнě  те  алтарь  ăçта  вырнаçнине  ыйтса  пěлнě.

- Алтарь  пулнă  вырăна  вăл  патаккипе  тěллесе  кăтартрě. Эпир  кěреçесем  илсе çав  вырăна  тасатрăмăр,  чăнах  та,  чиркÿ вырăнě,  -  каласа  парать  Вячеслав Мефодьев.

Чиркěве  ял  çыннисем  хăйсем  чěртсе  тăратнă.  Ăста  платниксенчен  пěри  йывăçран хашакасем  (наличниксем)  касса  кăларнă,  вěсем  çурта  тултан  та,  шалтан  та  илем кÿреççě.  Иконостассем  те  хатěрпе  пěрех.

- Эскизěсене  хамах  ÿкертěм.  Юлташсем  хыр  хăмасене Мускавран  кÿрсе килчěç,  - тет  Александр  Андриянов  предприниматель.

Пачăшкă  çак  ялтанах.  Ял  çыннисем  каланă  тăрăх,  хăйсем пархатарлă  ěç  тунине вěсем  пěр  тěлěнмелле  пулăм  хыççăн туйса  илнě.  Волгоградран  купол  кÿрсе килнěшěн  укçа  тÿлемелле  пулнă.  Анчах  çав  кун  вырăнта  предприниматель  те, çынсен  укçа – тенкě  те  пулман.  Вара  вěсем  чиркÿ  тума  пулăшма  укçа  пуçтарма ялти  лавккана  лартнă  ешчěке  уçнă,  унта  22 пин  те  500  тенкě  пулнă.  Вěсен куполшăн  шăп  та  лап  çакăн чухлě  сумма  памалла  пулнă.

Чиркÿ  хатěрпе  пěрех.  Ăшă  урай  туса  пěтермелле,  иконостассене вырнаçтармапла.

Хамăр  хыпар