Йĕпреç поселокĕнче пурăнакан Ольга Захаровнăпа Михаил Семенович Семеновсем çак кунсенче çемье çавăрнăранпа 65 çул çитнине паллă турĕç.

Тимĕр туй ячĕпе телейлĕ мăшăра 7 ачи, йышлă мăнукĕ, мăнукĕсен ачисем, тăванĕсем ăшшăн саламласа ырлăх-сывлăх сунчĕç.

Вĕсем Канаш тăрăхĕнчи Малтикаспа Шуркассинче çуралса ÿснĕ. Кил хуçи вăрçа кайиччен Канашри педучилищĕрен вĕренсе тухнă. 1940 çулта Улькапа пĕрлешнĕ.

- Манăн аттпепе анне ир вилнĕ. Мана пысăк анне ÿстернĕ. Пĕлместĕр-ха вăл камне. Манăн пысăк анне - Çеçпĕл Мишшин амăшĕ - Агафья Николаевна. Сăвăçа çуратнă хĕрарăм пире туйра панă пил сăмахĕсене пурнăç тăршшĕпех чун-чĕрере упрарăм, - тет паян Улька аппа. - Сывă чухне хăйне Йĕпреçе темиçе хутчен те чĕнеччĕ. Шел, килсе кураймарĕ...

Семеновсем çур ĕмĕр каялла Йĕпреç поселокĕнче тĕпленнĕ. Михаил Семенович ăсталанă çуртра паян хăйсен ватлăх кунĕсене ирттереççĕ.