2001 çулхи январь уйăхĕнче районти халăх райадминистраци пуçлăхĕ пулма С.Антонова суйланăччĕ. Тăватă çул сисĕнмесĕр иртрĕ. Çак тапхăрта районăн социаллă пурнăçĕпе экономика аталанăвĕнче ырă улшăнусем нумай пулчĕç. Газ кĕртесси, çул-йĕр тăвасси лайăх шайра, çĕнĕ шкулсем хута кайрĕç, культура, вĕренÿ, сиплев, социаллă сфера учрежденийĕсем çĕнĕ сăн-сăпат илчĕç. Халĕ тата ял çыннисене пахалăхлă ĕçмелли шывпа тивĕçтерес енĕпе    çине тăрса тăрăшаççĕ. Пĕр сăмахпа, ЧР Президенчĕн программисем пирĕн районта ăнăçлă пурнăçланса пыраççĕ.

Кăçалхи октябрĕн 16-мĕшĕнче - суйлав. Районта пурăнакан халăх район пуçлăхне, депутатсен районти Пухăвĕн депутачĕсене суйлĕ. Çак ыйту депутатсен районти Пухăвĕн лару кун йĕркине кĕртнĕ ыйтусенчен чи пĕлтерĕшли пулчĕ.

Капиталлă строительство пайĕн пуçлăхĕ В.Жураев Шăхасанта тăвакан физкультурăпа спорт комплексĕ çинче чарăнса тăчĕ. Объектăн тĕп пайне хĕле кĕриччен хута яма палăртнă, никĕсне туса пĕтернĕ, халĕ «çĕр çинчи» ĕçсем пуçланмалла. Строительсем кăнтăрла та, çĕрле те ĕçлеççĕ. Комплекс, проект тăрăх, питĕ илемлĕ пулать. «Канашгаздорсервис» предприяти кредит илсе стенисене, тăррине хăвăртрах тума пуçласшăн. Спорт залĕн лаптăкăшĕ 30х18 метр, бассейн - 30х14 метр, тăршшĕ - 100 м, унсăр пуçне çуртра тренажер, массаж, ташă залĕсем, пысăк фойе, кафе, сауна пулаççĕ... Депутатсем çак ырă ĕçе вĕçне çитерме пулăшмалла терĕç. Район администрацийĕ поручитель пулмалла текен шухăша ырларĕç.

Канашри вăрман хуçалăх ертÿçин çумĕ И.Федоров Канаш лесничествин лесничине А.Рипанова Чăваш Республикин Патшалăх Канашĕн Хисеп грамотипе наградăласси çинчен сĕнÿ тăратрĕ, депутатсем унпа килĕшнине палăртрĕç.

- Вырма пуçланчĕ. Çав вăхăтрах выльăх апачĕ, çĕр хатĕрлесси çинчен те манмалла мар, - терĕ Сергей Васильевич.