Чăваш радион «Ăраскал» передачи эстрада юрăçисем хушшинче «Кайри - мала» хит-парад конкурсне кашни эрнерех ирттерет. Надежда Заводскова шăрантаракан юрăсем хит-парадăн çÿлти картлашки çинче вăрах вăхăт тытăнса тăраççĕ. Çакă унăн пултарулăхне кăмăллакансем нумаййăн пулнине çирĕплетет.

Юлашки çулсенче Надежда Ивановна районта ирттерекен пысăк мероприятисене хаваспах хутшăнать. Акă, сăмахран, пĕлтĕр те, кăçал та Акатуй пухăннă халăх унăн савăк юррисене итлесе киленме пултарчĕ.

Нумаях пулмасть Надя хăй çуралса ÿснĕ тăван ялта - Яманкассинче пултарулăх каçне йĕркелерĕ. Ялти клубра ларма-тăма вырăн çук тесен те тĕрĕсех - халăх лăк тулли. Кун чухлĕ çын пухăнни пулманччĕ халиччен. Ара, артист-юрăçсем хăçантанпа килмен те Яманкассине, ял-йыш концерт-спектакль курмасăр тунсăхланă. Кÿршĕ ялтан та килнĕ концерт курма.

Надежда Заводсковапа пĕрле Елена Иовлева, Иван Шинжаев, Валерий Алексеев çынсене пысăк савăнăç кÿчĕç. Сăмах май, Елена Иовлеван хунямăшĕ Яманкассинчен тухнă иккен. Кирек ăçта кайсан та йăх-хурăнташ йĕрне тупма пулать-çке-ха.

Чунтан савăнма, канма май туса панăшăн ял-йыш Надьăна, ытти юрăçсене тăвăллăн алă çупса саламларĕ, тав турĕ. Çакна та палăртмалла, пысăк ялсенче мероприятисене çын сахал пуçтарăнать пулсан, пирĕн ялта апла мар. Концерт пуласса пĕлсен зал туласса кĕтсех тăр, хулара пурăнаканнисем те килеççĕ. Çавăнпа пирĕн пата килекенсен хуçăк кăмăлпа тухса кайма тивмĕ. Яманкассисем хăнасене яланах тарават.