Канаш хулинче райпон ултă магазин. Вĕсенчен пĕри, промышленность таварĕсемпе сутă тăваканни, потребобществăн администраци çуртĕнче пĕрремĕш хутра вырнаçнă. 2003 çулта уçнă ăна. Ассортимент питĕ пуян кунта, çÿлĕксем çинче кил-çуртра кирлĕ çĕр тĕрлĕ тавар. Сутуçăсем магазина килекенсене ăшă кулăпа кĕтсе илеççĕ, кирлĕ япала суйласа илме пулăшаççĕ: «Пирĕн пата килсех çÿрер, ĕçлес хавхалану кĕрет вара», - тесе ырă сунса ăсатаççĕ.

Виççĕн вĕсем, пĕр-пĕринпе ылмашăнса ĕçлеççĕ. Татьяна Харитонован ĕç стажĕ вунă çул ытла. Прилавок умĕнче ялан вăр-вар вăл. Наталья Гурьева та маттур. Вунă çула яхăн ĕçтешĕсемпе килĕштерсе сутă тăвать. Ольга Швардакова - çулĕпе чи çамрăкки. Райпо тытăмĕнче виççĕмĕш çул кăна ĕçлет-ха. Çак магазина киличчен район администрацийĕнчи киоскра пĕр çулталăк апат-çимĕç сутнă. Нумаях пулмасть Ольăна заведующи пулма уйăрса лартнă. Çамрăк специалист райпо ертÿçисен шанăçне тÿрре кăларма тăрăшать.

- Пирĕн ĕçри ăнăçу суту-илÿ культурине çирĕп пăхăннинчен те нумай килет, - палăртать вăл. - Çавăнпа эпир тавар туянакансемпе çепĕç калаçатпăр.

Тĕрĕсех ĕнтĕ, кăмăл хуçăк пулсан та сутуçăн лавккана килекенсемпе тарават пулмалла, тĕрĕссипе каласан, ăна юрама тăрăшмалла. Кирлĕ тавар ялан хакра теççĕ те, ăна та ырлама пĕлмелле-çке. Вăкăр пек сивĕ куçпа пăхса тăрсан, паллах, нимле тавар çаврăнăш та пулмĕ. Кăнттам çын сутуçă пулма пултараймасть.