Канашри райпо çуртĕнче, иккĕмĕш хута хăпарсан, стена анлăшне йышăнакан «Вĕсемпе пирĕн коллектив мухтанать» стенд куç умне тухса тăрать. Ĕçлĕ тупăшура палăрнă вунă ĕçчен сăн ÿкерчĕкне вырнаçтарнă унта. Рынок экономикин тапхăрĕ пуçлансан чылай предприятире ĕçлекене çапла кăмăл-сипет тĕлĕшĕнчен хавхалантарас йăла манăçа тухрĕ, райпора вара, куратпăр ĕнтĕ, çын факторĕ яланах тĕп вырăнта. Хастарлăхпа, тăрăшулăхпа, çаврăнăçулăхпа ырă тĕслĕх кăтартакан ĕçченсене кунта чыс тума манмаççĕ.

- Пурнăç улшăнса малалла кайнă май суту-илÿ культури лайăхланать, общество апатлану предприятийĕсен сăн-сăпачĕ çĕнĕлет, производствăн хушма участокĕсем уçăлаççĕ. Çаксене пĕтĕмпех пирĕн ĕçчен çынсем тăваççĕ. Вĕсене тухăçлă ĕçлеме тивĕçлĕ условисем туса панипе пĕрлех тăрăшулăхшăн хавхалантарни те кирлĕ. Ĕмĕт-тĕллевсене пĕрлехи вăйпа пурнăçа кĕртсе ăнăçу çулĕпе малалла утмалла пирĕн, - тет райпо правленийĕн председателĕн кадрсемпе ĕçлекен çумĕ Зоя Владимирова.

Хисеп хăми çине сăнланнă ĕçченсемпе пирĕн хаçата вулакансене паллаштарар-ха. Акă вĕсем:

Ираида Петровна Иванова - Ухманти апат-çимĕç магазинĕн заведующийĕ. Вăл - Чăваш Республикин потребкоопераци ветеранĕ.

Елена Геннадьевна Николаева - Çĕнĕ Чалкасси ялĕнчи лавкка «хуçи». Суту-илÿре вăйне, чунне парса ĕçленипе коллективра пысăк ят-сум çĕнсе илнĕ.

Зоя Маркеловна Никитина - «Урюм» столовăй аслă поварĕ. Общепитра 1975 çултанпа тимлет, килен-каяна тутлă апат-çимĕçпе сăйлать.

Владислав Геннадьевич Дмитриев - водитель, пекарньăран ялти лавккасене çăкăр турттарать. Хĕвел хĕртсе пăхать-и е куç курми çил-тăман çавăрттарать, ÿркенмен шофер кирек мĕнле çанталăкра та çул çинче - тавара унăн вăхăтра вырăна çитермелле.

Людмила Петровна Петрова - райпон Канаш хулинче вырнаçнă «Юмах» магазинĕн заведующийĕ. Суту-илÿре пысăк опыт пухнă, хăйĕн пултарулăхĕпе ĕçтешĕсене хавхалантарса пырать.

Лидия Васильевна Лукина - хатĕрлев агенчĕ. Ялти магазинсенче халăхран йышăннă аш-какая, сĕте, ытти тĕрлĕ чĕртавара пухса хатĕрлев кантурне илсе килессипе тимлет вăл, агент пулса 1989 çултанпа вăй хурать. Тăрăшулăхшăн район администрацийĕн тата райпо Канашĕн Хисеп грамотисене тивĕçнĕ.

Любовь Ивановна Алексеева - Пайкилтри магазин заведующийĕ. Райпо тытăмĕнче 1987 çултанпа ĕçлет. Çамрăксен наставникĕ, суту-илĕве суйласа илнĕ вуншар хĕр -упраçа ĕçпе те, ырă канашпа та пулăшнă. Тавар сутнипе пĕрлех хатĕрлев енĕпе те плансене ăнăçлă пурнăçласа пырать.

Екатерина Михайловна Яковлева - Анат Сурăмри пекарньăри хатĕр продукци кладовщикĕ. Республикăри потребкоопераци ветеранĕ. Тÿрĕ кăмăллă ĕçчен, ĕçе лайăх йĕркелеме пĕлнипе палăрса тăрать. Художество пултарулăх концерчĕсенче куракансене илемлĕ юрăсем шăрантарса савăнтарать.

Любовь Маркеловна Паталова - бухгалтер. Шупашкарти кооператив техникумĕнчи экономика уйрăмĕнче пĕлÿ илнĕ хыççăн тăван ялта - Сиккассинче хуçалăх таварĕсен магазинĕн заведующийĕнче ĕçленĕ. Райпо тытăмĕнче 1972 çулхи июлĕн 19-мĕшĕнчен вăй хурать. Ăна Центросоюз тата Чăвашпотребсоюз Хисеп грамотисемпе, «Раççей потребкооперацийĕнче хастар ĕçленĕшĕн», «Чăваш Республикинчи потребкоопераци ветеранĕ», «Потребкооперацире 30 çул тÿрĕ кăмăлпа ĕçленĕшĕн» паллăсемпе чысланă.

Алина Александровна Яковлева - Малтикас ялĕнчи магазин заведующийĕ. Шупашкарти кооператив училищинче сутуçăна вĕреннĕ. 1991 çулта Янкăлчри магазин заведующийĕ пулса ĕç биографине пуçланă, 1997 çултанпа - Малтикасра. Пĕлтĕрхи иккĕмĕш çур çулта «Чи лайăх кооператив участокĕ» ята çĕнсе илессишĕн Раççейри конкурса хутшăнса 2-мĕш вырăна тухнă, ятарлă диплома тивĕçнĕ.

- Ĕçе чунтан парăннă çынсем чăмăртаннă пирĕн йыша, - тет райпори кадрсен пайĕн ертÿçи Зоя Владимирова. - Пултаруллă çынсем - потребобществăн иксĕлми пуянлăхĕ. Вĕсен хастар ĕçĕпе малалла ăнăçлăн утăмлатпăр, мал ĕмĕтпе пурăнатпăр.