Район пуçлăхĕ С.Антонов кашни уйăх пуçламăшĕнчех пайсемпе службăсен ертÿçисемпе, ял администраци пуçлăхĕсемпе тата специалисчĕсемпе ĕç кăтартăвĕсене пĕтĕмлетсе анлă канашлу ирттерет. Виçĕм кун унта хутшăннисем 9 ыйту пăхса тухрĕç.

Районта мăйракаллă шултра выльăх пĕтĕмпе 16 пин, сыснасем - 7 пин. Районти тĕп ветврач А.Степанов пĕлтернĕ тăрăх, выльăхсене хĕл каçарма хатĕрленĕ утăран 1-мĕш класли 12 процент кăна,16 проценчĕ пачах класлă мар. Çакнашкал утă «Зенит», «Искра», «Пахарь» хуçалăхсенче нумай.

Çĕр ресурсĕсемпе çĕр йĕркелÿ комитечĕн ертÿçи С.Мулюков районта пушă выртакан çĕрсем чылай пулнине палăртрĕ, «Сормовский», «Урожай», «Яндоушский», «Аниш», «Знамя», «Рассвет», «Мотор» ЯХПКсенче усă курман çĕр лаптăкĕсем уйрăмах пысăк.

Районти тĕп больницăн тĕп врач çумне Т.Осипована сиплев учрежденине çамрăк специалистсем килменни, врачсем ватăлса пыни пăшăрхантарать. Терапевтсем, педиатрсем çитмеççĕ. Кăçал 28 çын çакăнса вилнĕ, вĕсенчен 2-шĕ - хĕрарăмсем. Ĕçкĕ-çикĕпе минренĕ вăйпитти çынсем пуçне  мăйкăч ăшне чикеççĕ. Ĕçкĕ-çикĕпе иртĕхни, пирус туртни, наркомани туберкулеза сарăлма пулăшаççĕ. Кăçал районта çак чир паллисемпе çĕнĕрен 20 çынна палăртнă, пĕлтерчĕ Л.Алексеева фтизиатр, анчах вĕсем хăйсен сывлăхне вăхăтра тĕрĕслеттермеççĕ. Иккĕмĕш Хурамалта, Çĕнĕ Пинерте, Маякра, Катекре, Çĕнĕ Чалкассинче, Хучелте, Çĕнĕ Шелттемре пурăнакансенчен 11-17 проценчĕ кăна флюрографире пулнă.

- Район бюджетĕнчен медицинăна çулленех 1,5-3 млн. тенкĕ хыватпăр. Пысăк пулăшу çакă. Апла сирĕн хăвăрăн ĕçе вăйлатмалла, ялсене тухса çÿресе ял администраци пуçлăхĕсемпе тачă çыхăнса ĕçлемелле, чир-чĕртен асăрханма халăх хушшинче пĕрле профилактика мероприятийĕсем ирттермелле, - терĕ район пуçлăхĕ С.Антонов медиксем хăйсен вăйсăрлăхне тĕрлĕ çитменлĕхсемпе сăлтавланине хирĕç.

Районти вĕрентÿ управленийĕн пуçлăхĕ Ю.Алексеев, çул çитмен ачасемпе ĕçлекен комисси председателĕ пулнă май, унăн пĕрремĕш çур çулти ĕçĕ-хĕлĕ çинче чарăнса тăчĕ. Комисси уйăхра 2 лару ирттерет, унта йĕркене пăсакан ачасемпе вĕсен ашшĕ-амăшĕсене чĕнеççĕ. Кăçал 90 ытла протокол пăхса тухнă.

Канашри сыр комбиначĕ çулталăк хушши ĕçсĕр тăрать. Предприяти 36 млн. тенкĕ парăма кĕнĕ-мĕн Ăна тулли хăватпа ĕçлеттерсе яма пултаракан инвестора тупаймастпăр, тет АУО конкурс управляющийĕ А.Крамаренко. Канашри аш-какай комбинатĕнче те шăплăх. Технологи линийĕсене тĕпрен улăштармалла, анчах пирĕн ун пек пысăк укçа çук, халĕ газ кĕртессипе ĕçлетпĕр, тет «Находка» производствăпа коммерци фирмин ертÿçи Г.Евлампьев. Звениговăра, Теччĕре аш-какай комбиначĕсем 10 пин гектар çĕр çинче хăйсем выльăх тытаççĕ, çавăнпа продукци хăй хаклăхĕ пĕчĕк. С.Антонов вĕсен опычĕпе паллашма сĕнчĕ.

Канашлура патшалăх статистикин Канашри территори уйрăмĕн тĕп специалисчĕ Г.Алексеева Пĕтĕм Раççейри ял хуçалăх çыравне ирттерме хатĕрленÿ мероприятийĕсемпе, «Энергия» АХО ертÿçи В.Михайлов çак организаци ĕçĕ-хĕлĕпе паллаштарчĕç. Район пуçлăхĕ С.Антонов кашни ыйтупах ĕçе лайăхлатма, йывăрлăхсенчен тухма паха сĕнÿ-канаш пачĕ.