Районта райпон - 88, хулара 6 магазинĕ ĕçлет. Кăçал пĕрремĕш çур çулта вĕсенче пĕтĕмĕшле тавар çаврăнăшĕ 86,3 млн. тенкĕпе танлашнă. Яланхиллех Маякри, Ямашри, Катекри, Шăхасанти, Ухманти тата Канаш хулинчи кооператив предприятийĕсем ÿсĕмлĕн ĕçлеççĕ.

Тавар туянакан магазина пырсан унтан тулли кăмăлпа тухса кайтăр тесе райпора нумай ĕç тăваççĕ. Пĕлтĕр, акă, 7 магазина тĕпрен юсанă, 8-ĕшне çут çанталăк газĕ кĕртнĕ. Ял çыннисен кăмăл-сĕнĕвĕсене шута илсе 42 лавккара медицина таварĕсем сутакан кĕтессем йĕркеленĕ, 12-ĕшĕнче чей сĕтелĕсем вырнаçтарнă, 26-шĕнче ритуал хатĕрĕсем сутаççĕ.

Калас пулать, сутуçăсем те, общество аталанăвĕн тытăмĕнче тăрăшакансем те рынок условийĕсенче ÿсĕмлĕн ĕçлеме вĕренсе çитнĕ. Ялсенчи лавккасенче ĕçлекенсем халĕ тавар сутакансем кăна мар, вĕсем хатĕрлевçĕсем те - халăхран сĕт, аш-какай, кивĕ хут, çĕтĕк-çурăк, полиэтилен, ытти чĕртавар йышăнаççĕ, çапла вара хуçалăхра усă курма юрăхсăр хатĕре пухса ял çыннисене çемье бюджетне пуянлатма майсем туса параççĕ.

Райпо магазинĕсен ĕçĕ-хĕлĕпе халăх чăннипех кăмăллă. Вĕсенче пуринче те эрнере икĕ хутчен ассортимент пуянланать, вăл тăтăшах анлăланса пырать. Ял çыннисен заявкисем тăрăх кил умнех цементпа шифер, ытти строительство материалĕсем, сĕтел-пукан, йăлара усă куракан тĕрлĕ техника хатĕрĕсем турттарса пырса параççĕ. Шăхасанта тата Ямашра ветеринари препарачĕсем сутассине йĕркеленĕ. Суту-илÿ ĕçченĕсем тавар туянакансен пĕр ыйтăвне те тимлĕхсĕр хăвармаççĕ. Районти потребкоопераци тытăмĕнче чĕрĕк ĕмĕр ытла вăй хуракан сутуçăсем те, ĕçе тинтерех вырнаçнисем те йышлăн. Кашниех пултаруллă та хастар. Професси уявĕпе саламлатпăр вĕсене.