Инна Романова Хыçалкас ялĕнче пурăнать, Энтрияль вăтам шкулĕнче вĕренет. Кăçалхи çуллахи каникул унăн асĕнче нумайлăха юлĕ - хĕрача Пĕтĕм Раççейри «Орленок» ача-пăча сывлăх центрĕнче каннă. Путевкăна вăл район администрацийĕн социаллă хÿтлĕх пайĕ урлă илнĕ.

Инна çăмăл атлетика енĕпе районта пĕрре мар чемпионка пулнă, республикăри ăмăртусенче те малти вырăнсене йышăнать. Пĕлтĕр, акă, районта физкультура олимпиадинче çĕнтерчĕ.

«Орленок» сывлăх центрĕнче Инна çĕннине нумай курса пĕлнĕ, шыв айĕпе ишекенсен кружокне, астрономи музейне экскурсие çÿренĕ, ăмăртусемпе конкурссене хутшăннă, çĕнĕ туссем нумай тупнă. Смена вĕçленнĕ хыççăн центр пурнăçне хастар хутшăннăшăн Иннăна диплом тата «Орлятский» значок панă.

Сăмах май, «Орленок» Хура тинĕс хĕрринче, Краснодар крайĕнчи Туапсе курорт-хуларан 45 çухрăмра вырнаçнă. Центр Раççейри 89 регионтан, аякри тата çывăхри чикĕ леш енчен ачасене йышăнать. Пĕр вăхăтра унта çулла икĕ пин, хĕлле 800 яхăн ача канма пултарать. «Орленока» йĕркеленĕренпе кăçал июлĕн 12-мĕшĕнче 45 çул çитет.