РФ Президенчĕн 1993 çулхи майăн 16-мĕшĕнчи Указĕпе килĕшÿллĕн Раççей почтин кунне çирĕплетнĕ. Канашри почтамтра вăй хуракансем хăйсен професси уявне çĕкленÿллĕ кăмăл-туйăмпа кĕтсе илеççĕ: чылай кăтартупа палăртнă тĕллевсем ăнăçлăн пурнăçа кĕрсе пыраççĕ. Коллектива виççĕмĕш çул В.Андриянов ертсе пырать. Виталий Михайлович çак отрасльте 1987 çултанпа вăй хурать. Мускаври гуманитарипе экономика институтĕнче аслă пĕлÿ илнĕ. Уяв умĕн вăл почтăра тимлекенсен ĕçĕ-хĕлĕпе паллаштарма хаваспах килĕшрĕ.

- Виталий Михайлович, ĕлĕкрех районти почта çыхăнăвĕн узелĕ теттĕмĕр тĕп почтăна, халĕ - почтамт. Унăн тытăмĕ, ахăртнех, пирĕн хаçата вулакансене интереслентерет. Тĕплĕнрех каласа параймăр-ши;

- Тархасшăн. Эпир - «Раççей почти» патшалăх унитарлă предприяти филиалĕн - Чăваш Республикинчи почта çыхăнăвĕн федераллă Управленийĕн структура подразделенийĕ, урăхла каласан, çак пысăк тытăмăн пĕр пайĕ. Пирĕн йыша районти 25 тата хулари 6 çыхăну уйрăмĕсем кĕреççĕ. Коллективра виççĕре яхăн çын, çак йышран çурри - почтальонсем. Вĕсем хаçатсемпе журналсене, посылкăсемпе бандерольсене, çырусене тата почта урлă куçарнă укçа-тенкĕне вырăна вăхăтра çитерессишĕн тăрăшаççĕ. Пирĕн харсăр почтальонсем - пурте ÿркенмен маттур хĕрарăмсем вĕсем - ялсенче кашни киле çитсе ватăсене пенси укçи валеçеççĕ. Унсăр пуçне юлашки çулсенче çыхăну уйрăмĕсенче халиччен почтăра пулман пулăшу ĕçĕсене йĕркелесе ятăмăр. Тĕслĕхрен, коммуналлă пулăшусен тата çăмăллăхсен тÿлевĕсене йышăнатпăр, лотерея билечĕсене тата «Билайн», «Мегафон», «Шупашкар-GSM» сотовăй компанисен экспресс-тÿлев карточкисене сутатпăр, клиентсемпе автогражданство яваплăхне тивĕçлĕ йĕркепе страхлас, çавăн пекех пурлăха страхлас енĕпе ĕçлетпĕр, палăксем çине çавра сăн ÿкерчĕксем тума саккассем илетпĕр тата, ытти тĕрлĕ пулăшусем кÿретпĕр. Тĕп почтăри Интернет-салона çамрăксем йышлăн çÿреççĕ. Пĕтĕмлетсе каласан, пулăшу ĕçĕсене эпир çулсеренех анлăлатса пыратпăр. Пирĕн пата килсе çÿрекенсене яланах меллĕ пултăр. Çак девиза яланах тĕп вырăна хуратпăр.

- Пĕрремĕш çур çулта мĕнле кăтартусемпе ĕçлерĕр;

- Тупăшсем енĕпе плана 101 процент пурнăçларăмăр. Çырăнтару, йывăрлăхсене пăхмасăр, йĕркеллĕ иртрĕ. Пĕтĕмĕшле тиража сыхласа хăварма пултартăмăр. Районта тухса тăракан «Канаш ен» хаçата вулакансен йышĕ палăрмаллах ÿсни савăнтарать. Ялсенчи почта уйрăмĕсенче вăй хуракансем аван ĕçленине палăртса хăварас килет, çырăнтару планне ăнăçлă пурнăçларĕç пурте вĕсем. Пĕлтĕрхи пĕрремĕш çур çулта районта тата хулара пирĕн почтальонсем вырăнти изданисене, «Канаш ен» тата «Канаш» хаçатсене, 2167 çурта тата хваттере çитернĕ пулсан, халĕ подписчиксен йышĕ пилĕкçĕре яхăн ÿсрĕ. Кăçалхи июлĕн 1-мĕшĕнчен пин çурă ытла район пурнăçне çутатакан «Канаш ен» илсе тăма кăмăл турĕ. Çырăнтару ĕçĕнче район администрацийĕ яланхиллех пире пысăк пулăшу кÿчĕ. Районпа хулара «Аргументы и факты», «ЗОЖ», «Почтовый экспресс», республикăра тухса тăракан изданисем аван саланаççĕ. Ведомство çырăнтарăвĕ те ÿсрĕ.

- Чăнах та, çитĕнÿсем пур. Коллектив çине тăрса ĕçленипе пулнă ĕнтĕ çак ÿсĕмсем. Апла уяв умĕн тăрăшуллă çченсене палăртса хăварни питĕ вырăнлă пулĕ. Камсем-ши вĕсем;

- Пирĕн почтамтра тÿрĕ кăмăллă, хăйсен профессине чунтан юратакан, нимле йывăрлăхсенчен те хăрамасăр яваплăха туйса ĕçлекенсем нумай. Çакă, тÿррипех калатăп, питĕ савăнтарать мана. Акă, производствăпа эксплуатаци участокĕнче Зиновия Степановапа Римма Школьникова 1968 çултанпа почтальонра ĕçлеççĕ. Тивĕçлĕ канăва тухма вăхăт çитнĕ пулин те юратнă ĕçрен уйрăлма васкамаççĕ. Пĕри «СССР Çыхăну министерствин чи лайăх почтальонĕ» хисеплĕ ята тивĕçнĕ, теприне «Раççей почти» федераллă патшалăх предприятийĕн Хисеп грамотине илме тăратрăмăр. Карăклăри çыхăну уйрăмĕнчи Зоя Иванова, Ухманти Нила Павлова почтальонкăсем, Шуркассинчи çыхăну уйрăмĕн пуçлăхĕ Людмила Евстафьева Хисеп грамотисене тата укçан премисене пĕр мар тивĕçнĕ.

Ялсенчи почта уйрăмĕсен пуçлăхĕсем Лариса Захарова (Чакаç), Татьяна Павлова (Малти Тукай), Елена Александрова (Ухман), Эльвира Петрова (Вăтакас Татмăш), Марина Лукянова (Шăхасан) ĕç калăпăшне ÿстерсех пыраççĕ.

- Ÿсĕмсем тума шанчăклă никĕс кирлĕ. Ку енĕпе сирĕн ĕç-пуç аван пулни курăнать - ура çинче çирĕп тăратăр.

- Управленире тупăшсем енĕпе 2-3 вырăнсене пайлатпăр эпир, районти 106 яла пилĕк кун хушши почта турттаратпăр. Паллах, пурлăхпа техника никĕсне çĕнетме, ĕç вырăнĕсенче тивĕçлĕ условисем тума тăрăшатпăр, Акă, пĕлтĕр Çеçпĕлти, Асхвари, Ухманти, Вăтакас Кипечри çыхăну уйрăмĕсене çут çанталăк газĕ çитрĕ. Тĕп почтамтра та ырă улшăнусем пулчĕç: администраци çурчĕн фасадне çĕнетрĕмĕр, шалти пÿлĕмсенче Европа стандарчĕпе юсав ĕçĕсем турăмăр. Строительсем халĕ иккĕмĕш хутра ĕçлеççĕ. Тĕплĕ юсав хыççăн кунта финанспа экономика служба специалисчĕсем тата ытти ĕçченсем валли тăватă ирĕк те меллĕ пÿлĕмсем пулĕç.

- Виталий Михайлович, уяв умĕн хăвăр коллектива мĕн суннă пулăттăр;

- Туслăхпа вăйлă пирĕн коллектив. Пĕр-пĕрне ăнланни, кирек хăçан та пулăшма тăрăшни, умри тĕллевсене çĕнсе илме ăнтăлни çитĕнÿ çулĕпе шанчăклăн малалла утăмлама май парать. Малашне те аталану çулĕнчен пăрăнас марччĕ. Эсир мана тивĕçтернĕ майлă самантпа усă курса пур ĕçчене те хамăрăн професси уявĕпе хаçат урлă чун-чĕререн саламлатăп, малашне те ĕçре çитĕнÿсем тума ырлăх-сывлăх, телей сунатăп.