Ака-суха вĕçленсен районта акатуй шавласа иртрĕ. Райпо та культура çурчĕн ĕçченĕсемпе пĕрле Шăхасанта çавăн евĕр уяв йĕркелесе ачасене савăнтарчĕç. Малтанах вĕсене ял администраци пуçлăхĕ Виталий Дмитриев, райпо правленийĕн председателĕн çумĕ Зоя Владимирова саламларĕç.

- Пĕлтĕр сире валли «Солнышко» выляв лапамĕ уçрăмăр. Сирĕн сăн-питре ялан хĕвел шевли вылятăр. Шкулта лайăх вĕренĕр, тарăн пĕлÿ илме тăрăшăр, - терĕ Зоя Борисовна, ачасене ырă сунса.

Районти тĕслĕх библиотека методисчĕ Любовь Егорова, куçса çÿрекен клуб учрежденийĕн ертÿçипе методисчĕ Алевтина Яшмановапа Галина Кузнецова тĕрлĕ вăйăсемпе конкурссем ирттерчĕç. «Чăваш Енĕн пултаруллă ачисем» республика конкурсăн лауреачĕ Максим Степанов, музыка шкулĕнче вĕренекенскер, юрăсем шăрантарса хитре сассипе тыткăнларĕ.

Спорт вăййисем шавлă ача-пăчана уйрăмах хаваслăх кÿчĕç. Пĕчченшерĕн те, ушкăнпа та ăмăртрĕç ачасем, районти культура çурчĕ вĕсен сассипе янăраса кăна тăчĕ. Райпон кадрсен пайĕн ертÿçи Зоя Владимирова тата социаллă мисси менджерĕ Владимир Алексеев çĕнтерÿçĕсене кĕнекесем парнелерĕç, пылак çимĕçсемпе сăйларĕç. Ачасене вăйăсем те, спонсор кучченеçĕсем те питĕ килĕшрĕç. Çуллахи кунсенче ялти выляв лапамĕнче кун пек уявсем татах пулĕç-ха.