Халăха массăлла спорта явăçтарас тата республикăра сывă пурнăç йĕркине тытса пырас тĕллевпе Чăваш Ен правительстви пысăк тÿпе хывни куçкĕрет. Пĕлтĕр, акă, çакна тĕпе хурса ЧР Президенчĕ Н.Федоров ятарлă указ та кăларнăччĕ. Кун пек тĕллевлĕ программа йышăнни республикăри спорт юхăмĕн аталанăвĕ çине пысăк витĕм кÿни вăрттăнлăх мар паллах. Çакна Чăваш Ен спортсменĕсем юлашки вăхăтра Раççей шайĕнче иртекен ăмăртусенче çĕнтерÿсемпе час-час палăрни те тÿрремĕнех çирĕплетет. Пирĕн ентешсен çитĕнĕвĕсене Раççейре асăрхамасăр иртмеççĕ курăнать. Çуллахи ял спорт вăййисен Пĕтĕм Раççейри V ăмăртăвĕсем те пĕлтĕр ахальтен мар-тăр пирĕн республикăра иртрĕç.

2004 çул Шупашкар районĕнчи Кÿкеç поселокĕнче пурăнакансемшĕн вара тепĕр паллă пулăмпа та çыхăннă, пĕлтĕр шăпах Çуллахи ял вăййисемпе пĕрле унта 1500 вырăнлă стадион уçăлнă. Кăçал «Олимпийский» хута кайнăранпа çулталăк çитрĕ. Унăн «çуралнă кунĕ» питĕ шавлă иртрĕ., уява Мари Эл, Тутар республикисемпе Канаш, Шупашкар тата Елчĕк районĕсенчен пĕтĕмпе 35 ытла команда, е 250 ытла спортсмен хутшăнчĕ. Пирĕн район делегацийĕ спорт уявне 3 автобуспа килсе çитрĕ, вĕсен йышĕнче район администрацийĕн пуçлăхĕ С.Антонов та пулчĕ. Спортпа çывăх туслашнă майăн Сергей Васильевич ăмăртусене хăй те хутшăнчĕ, çавăн пекех çитĕнÿсем тума район атлечĕсене те хавхалантарса пычĕ.

Спорт уявне Шупашкар район администарцийĕн пуçлăхĕ А.Князев уçрĕ. Хăнасене саламланă майăн уява пуçтарăннисене чи малтанах стадионăн кĕске историйĕпе паллаштарчĕ. «Олимпийские» уçнă çĕре пĕлтĕр Çуллахи ял спорт вăййисен Пĕтĕм Раççейри V ăмăртăвĕсен йĕркелÿ комитечĕн председателĕ - Раççей Федерацийĕн ял хуçалăх министрĕ А.Гордеев тата туризмăн Федераци агентствин ертÿçи, Олимп вăййисен икĕ хут чемпионĕ В.Фетисов хутшăннине, стадионта çавăн пекех СССР летчик-космонавчĕ, авиаци генерал-майорĕ, икĕ хут Совет Союзĕн Геройĕ, Чăваш Республикин хисеплĕ гражданинĕ А.Николаев пулнине те палăртрĕ район пуçлăхĕ. Спортсменсене çавăн пекех стадиона хăпартнă тапхăрта подрядчик пулса ĕçленĕ «Водстрой» тулли мар яваплă обществăн гендиректорĕ В.Ильин, Канаш район администрацийĕн пуçлăхĕ С.Антонов, Мари Эл Республикин Медведевски район администраци пуçлăхĕн çумĕ А.Килюшик тата ытти хăнасем те саламласа çĕнтерÿсем сунчĕç.

Тÿрех палăртса хăварам, çăмăл атлетсен ăмăртăвĕсенче пирĕн район спринтерĕсемпе пĕр тан тупăшакансем пулмарĕç, вĕсем пĕрлехи тупăшура ытти районсене чылай кая хăварса пĕрремĕш тухрĕç. Акă, 100 метрлă дистанцире Наиль Галимзянов (унăн вăхăчĕ 11.20) - пĕрремĕш, Николай Михайлов (11.48) - иккĕмĕш вырăнсенче, çак дистанцирех хĕрсем: Оля Степанова (14.02) - иккĕмĕш, виççĕмĕш вырăнта - Екатерина Рублева (14.39* пурте Энтриялĕнчен). 400 метрлă дистанцире Оля Степановăпа (1.5) Анастасия Емельянова (1.8* райадминистраци) пĕрремĕшпе иккĕмĕш вырăнсенче. Арçынсем хушшинче ирттернĕ тупăшура ку дистанцие Денис Семенов (0.55* Энтрияль)  пĕрремĕш чупса тухрĕ. 800 метрлă дистанцире Ирина Орлова (2.23* Чакаç) - пĕрремĕш, Андрей Егоров (2.05* Аслă Мами) - иккĕмĕш вырăнсенче. Эстафетăра та çитĕнĕве алăран вĕçертмерĕç пирĕн спортсменсем: Екатерина Рублева, Оля Степанова, Инна Романова тата Ирина Орлова 4х400 метрлă дистанцире  финиша пĕрремĕш çитрĕç (59.13). Олег Орехов (Шăхасан), Андрей Егоров, Наиль Галимзянов тата Николай Михайлов арçынсен эстафета чупăвĕнче вăйăсен чемпионĕ ятне тивĕçрĕç (48.9).

Çăмăл атлетсен çитĕнĕвне кире пуканĕ йăтакансем те çĕнтерÿпе шанчăклăн çирĕплетрĕç. Канаш районĕ спортăн çак тĕсĕпе республикăра тĕп вырăн йышăнать. Кÿкеç стадионĕнчи пăхаттирсен кĕрешĕвĕ çакна тепĕр хут çирĕплетрĕ: пирĕн атлетсем кашни виçе категорийĕсенчех медальсем çĕнсе илчĕç. Сергей Шамбулин (Шелттем) - 80,5 (37-43,5), тĕнче класлă спорт мастерĕсем Андрей Атласкинпа - 158 (93-65) Дмитрий Васильев - 121 (21-100) иккĕшĕ те Чакаçран - пĕрремĕш, Александр Чернов (Чакаç) - 134 (81-53), район администрацийĕн пуçлăхĕ С.Антонов иккĕмĕш вырăнсене çĕнсе илчĕç. Сергей Васильевич хăйĕн виçинче Шупашкар атлетне тăватă очко çеç выляса ячĕ. Апла пулин те пирĕн район команди ку спорт тĕсĕпе те мала тухрĕ.

Ирĕклĕ мелпе кĕрешекенсен хушшинче пирĕн ентешсен команди иккĕмĕш пулчĕ. Ку ăмăртура пирĕн район чысне карăклăсем хÿтĕлерĕç: Родион Платоновпа (29 кг виçере) Алексей Егоров (32 кг) иккĕмĕш вырăнсене тивĕçрĕç, Роман Федоров (32 кг) виççĕмĕш пулчĕ.

Армспортра вара канашсем каллех мала тухрĕç.

Хĕрарăмсем - 60 кг çитичченхи виçере: 2. Света Атласкина (Чакаç)* 3. Наталья Осипова (Вăтапуç).

70 кг çитичченхи виçере: 1. Марина Кириллова (Ямаш)* 2. Ирина Сергеева (райадминистраци).

70 кг ытларах виçере: 1. Наталья Иванова (Чакаç)* 2. Светлана Иванова (Ямаш).

Арçынсем - 70 кг таран виçере: 1. Александр Мурзуков (Сиккасси).

80 кг таран виçере: 3. Сергей Данилов (райадминистраци).

Волейбол вăййисенче хĕрсемпе каччăсен командисем иккĕшĕ те иккĕмĕш вырăнсене тивĕçрĕç. Шашка турнирне район команди «кĕмĕл» медальпе вĕçлерĕ, шахмат вăййисенче пирĕн ентешсем виççĕмĕш пулчĕç.

Футболла выляса пирĕн район команди пĕрремĕш вырăна тухасса никамах та кĕтмен-тĕр. Çавăнпах савăнăçĕ те пысăк пулчĕ. Тайм хыççăн тайм çĕнсе пычĕç энтрияльсем. Финала тухса пьедесталăн чи çÿлти картлашки çине тăма та тивĕçлĕ пулчĕç вĕсем.

«Ылтăн» медальсен шучĕ кăçал шупашкарсен те, канашсен те пĕр тан пулчĕ. Çавăнпа та судьясем туслăх çĕнтернине палăртрĕç. Мĕнех, килес çул тата та хастартарах пулăпăр.