Виçĕм кун Канаш тăрăхĕнче Чăваш Республикин Физкультурăпа спорт министерствин кунĕ иртрĕ. Асăннă министерство ĕçченĕсем – ЧР физкультурăпа спорт министрĕ В.Краснов, министр çумĕ А.Яковлев, спорт министерствин физкультура уйрăмĕн пуçлăхĕ В.Игнатьев, вĕрентÿпе спорт секторĕн ертÿçи О.Букина вырăна тухса районти халăхпа тĕл пулусем ирттерчĕç. ЧР Министрсен Кибинечĕн Председателĕн пĕрремĕш çумĕ В.Краснов, район пуçлăхĕ С.Антонов Çеçпĕл, Ямаш тăрăхĕнче пурăнакансемпе тĕл пулчĕç. - Çеçпĕлĕн тăван ялĕ, шкулĕ, музейĕ илемленсе, аталанса пыни республика аталанса пынине пĕлтерет. Ялта пурăнакансенчен чылайăше çут çанталăк газĕн ырлăхĕпе усă курать, - терĕ Вячеслав Максимович. – Кăмăл, ĕç пулсан çамрăксем те ялта юлаççе. Апа-пăчча сасси ялăн малашлăхе пуласса пĕлтерет. Ачасем çирĕп сывлăха пулччăр тесен вĕсене ĕçпе, спортпа туслаштарма кирлине палăртрĕ министр. Урамра выляса ÿссен те, шкул, район, республика ăмăртăвĕсене хутшăнсан çитĕнÿ çулĕ тăма май пур. Канаш районĕн спортсменĕсем ялти çуллахи спорт вăййисене хутшăнса икĕ хутчен çĕнтерÿçĕ пулнă. Кăçал так çак çитĕнĕве тепĕр хут çирĕплетмелле.
Çеçпĕлти кивĕ клуб çурчĕ ахалех ларать. Хуçасăр çуртăн юхăнасси часах тесе ял администрацийĕн пуçлăхĕ Р.Иванова, вырăнти шкул директорĕ А.Петров кунта ирĕклĕ мелпе кĕрешмелли зал уçас шухăшлă. Министр вĕсен шухăшне хирĕçлемерĕ. Унчен вара кунта юсав иртермелле. Ямашри клуб çумĕнчи спорт залĕнче те тĕплĕ юсав ĕçĕсем тумалла. Мĕн пысăкăш залăн пĕр енчи стени шыв кайса тăнипе кăвакарса ларнă, штукатурки ишĕлнĕ. Урайĕ Пĕтĕмпех çĕрсе кайнă. Вăхăтĕнче вара çак залта мĕн чухлĕ çамрăк хайĕн вăй-халне çирĕплетмен-тĕр. Спорт шкулне юсама вăрман уйăрса панă. Çу кунĕсемпе тухăçлă усă юлмалла. - Пур япала юхăнса ларни – намăс, мĕн пурине – упрамалла. Хуçалăх ертÿçисемпе ял пуçлăхĕсен пĕрле килĕштерсе ĕçлемелле, - палăртрĕ В.Краснов министр. Район администрацийĕнче иртнĕ ĕçлĕ канашлура (унта ял администрацийĕн ертÿçисем, шкул директорĕсем, физкультура учителĕсем, спорт активисчĕсем пухăннă) С.Антонов район ĕçĕ-хĕлĕпе паллаштарче. Кăçал виçе шкул тăррине витсе пĕтернĕ, тепĕр виççĕшĕн тăррине витме палăртнă. 70 километртан кая мар газ пăрăхĕ хывмалла, 2450 киле çут çанталăк газĕпе тивĕçтермелле. Уй-хирте ешерекен калчаран тухăçлă тыр-пул туса илессшĕн тăрăшмалла. Вячеслав Максимович хăвăрт утассипе Европăн V Кубокне ирттерме хастар хутшăннăшăн район пуçлăхне С.Антонова, «Канаш» ЯХПК ертÿçине В.Долгова ЧР Министрсен Кабинечĕн Председателĕ, Кубок йĕркелÿ комитечĕн председателĕ Н.Партасова алă пуснă тав çырăвĕсем пачĕ.